الحمـد لله فـراج الـكـرب والغـمـوم
كمـا يليـق بجـلال الواحـد المقـتـدر


اللي هداني وانا ماكنت اصلـي واصـوم
واللي مسخر فـوادٍ كنـت اظنـه حجـر


ما يظلم الخلق وابـن آدم لنفسـه ظلـوم
ولا يكلـف بشـر مـالا تطيـق البشـر


الا ابتـلاء لمؤمـن او نـكـالا بـقـوم
استغفره لين ينبـع مـا ويفلـق صخـر


فاغفر ذنوبي جميعا يا اللطيـف الرحـوم
يكون ذنـبٍ احسـه ذنـب مـا يغتفـر


اعظم من الذل فعيـون الرجـال القـروم
واشنع من الغدر وارخص من تولي الدبر


يبقى لراعيه لـو يغفـر فوجهـي لـزوم
وابقى اتصفصف عنه حتى نهار الحشـر


يقول صبري لحزني فيـه مانـي ملـوم
ويقول حزني لصبري فيه..وجهـة نظـر


ويقول بعضي لبعضي فيه ما انت معصوم
ويقول بعضي لبعضي فيه تصلـى سقـر


ويقول لحمي لدمي فيه لـو فيـك سـوم
ويقول دمي لعرقـي جئـت شيئـا نكـر


اللي جعل ضحكتي عارة وطبعـي وجـوم
واللي كسر في عيوني شي مـا ينكسـر


واللي جعلني كذا فـض ووحيـد وكتـوم
واللي جعلني في الساحة (مسجل خطـر)


فليت الليالي فقط سـودا وليـت الهمـوم
عداد نشـر الدبـا وعـداد طلـع الثمـر


على فراق الذي لا زارنـي فـي الحلـوم
اقـوم وبوجنتينـي مـن دموعـي اثـر


يا مرقبي له من الشفيـان والا الرجـوم
احسبني المحـه فـي نـاوان والا وبـر


لجله اجِـل الشرايـع وانتمـي للجمـوم
واعشق ثرا الديرة اللي من ثراها خطـر


يا شق قلبي عليه اللـي يشـق الهـدوم
مشقـة ام ولدهـا ضـاع والا انتـحـر


رحلت مجبور عنه وفـي فـوادي علـوم
ما تنكتب لو مـداد البحـر كلـه شطـر


مرغم على المشي قدما في مهب السموم
استغشي الثوب او اوضع في اذاني وقـر


انسان يوم البشر كتلـة عظـام ولحـوم
لو ما ادخله ربي الجنـة نقصهـا الاجـر


كأن ما في عظامـه لا مشـى كالسيـوم
وكأن مشيته فديو كليـب لاسمـر عبـر


وكأن صدره سما بعـد انقشـاع الغيـوم
وكأن فمه هـلال وحسـن وجهـه بـدر


فيه الثقل والغنج شيخين ربـع وخصـوم
كل يقـول لخصيمـه يـا طويـل العمـر


مسكر بطبعه ولا ياثـم لـو ان الكـروم
تاثـم .. وربـي معلمنـا بــأن لا وزر


اعنـاك يالله فـاهـل منيمـسـي وروم
صنّاعة الموت تحسم موتـي المختصـر


مـ الصنع الاول على مرماه ما فيـه زوم
الـزوم يفـرز غشـم وبوارديـة خكـر


خشيبته وحدهـا تدفعـك نحـو الهجـوم
ما هي خديوي مورثهـا خديـوي مصـر


لوترمي العرش في ظني تطيـح النجـوم
ولو ترمي البحر مره مات ما في البحـر


تشيكيا ..جرمني ..بلجم بجـال الختـوم
ثلاثة اسمـاء لا شـي غيرهـا معتبـر


رصاصها عبقريـة شـر وامـا العلـوم
احدّ واصغر نصيفة مـن اذانـي الوبـر


بالله وما سخره فيهـا تطيـح الخصـوم
ثنتين هي والدعـا ممكـن تحـد القـدر


أعارها بن حضيرم في نهار اللزوم
لاعداه وانفضّت الدعوة وفات النصر


واهلك بها كاسب المعروف من بعد حوم
جدي سليم وقضت لابو مطير الوطر



وحروبها العالمية مـا اوقدتهـا السهـوم
ولا طمّـع النـازي الا عابـرات النحـر


وافعال زهران في الغازي ولا انسى البقوم
في عطف ريحان كم سوّت دروس وعبر



اظنها اهون على الوافي وراعي السلـوم
اذا اكتمل في عداه وفـي حبيبـه قصـر


والله ورب السنيـن المجدبـات الحسـوم
ما خذت منـه الـذي ماحللتـه السـور


اشرف من اني عليه ابكي وابل الكمـوم
دعوة مع والدينـي فـي صـلاة الفجـر


ودي اعتذر له قبل لا موت موتا مشـوم
واقول له لا تسامحنـي علـى مـا بـدر


يفقدني امي وابي لو كنت ابنسـاه يـوم
من قبل تتحشرج انفاسي واطـب القبـر