بعد الفقر حطت شريحة وجوال ** يسعــد مسا جوالها والشريحة
كانت تجيني تشتكي قلــة المال ** وتصيح لاجا طاري الفقر صيحة

تقول أبويه دايم الدوم رحـــال ** وامي كبيرة سن دايم طريحــــة
أنت الوحيد اللي لك القلب ميال ** أنت الكناني وأنا معشوقتك ذي حقيقة

كنا سوى نرسم على التربة آمال ** وأحلام تقتلها الحياة الشحيحة

الله كم صرخة وهمسة وموال ** الله كم جادت علينا القريحة
تخيل لومافي السما برق وخيال ** ونكذب الايام لو هي صحيحة

تقول لا حطيت لك بشت وعقال ** وسخر لك الرحمن عيشة مريحة
اخاف تتركني على عثرة الفال ** للفقر ووجيه الحياة القبيحة

وحبيتها بين الخلايق والازوال ** حب يطول الوقت ماحدن يزيحة
سلمتها قلب تباريه الاهوال ** وطاح الخفوق وطيحة القلب طيحة

راحت وخلتني مع القيل والقال ** شاعر صواريف الدهر تستبيحه
ودار الزمن وغير الحال بالحال ** وجاها الزمان بكل ورده وشيحة
فلة وخدامة . ولكزس . وجوال ** وانا عجزت ادفع رسوم الشريحة