انا عزيز وحاشدٍ هامتي فوق=لكن ماغيرك كسر كبريائي
اعز نفسي دوم ويذلها الشوق=واجي رغم عن كسرتي وانحنائي
اجيك غصب يسوقني يمك التوق=وانا من اطعونك تسربل دمائي
تحكيني العبره على طارف الموق=وتعجز ابياتي توصف رثائي
من سبتك شفني كما هايم النوق=وانا مع غيرك قويٍ إبائي
كني غريق ويرتجي منك الطوق=طوق النجاه اللي يروح عنائي
خلاص يكفي عاد ماسدك البوق=سرقت قلبي يالغظي من حشائي
يقلون صبر وكل مطرود ملحوق=وانا صبرت وهد صبري قوائي
صبراً محال ان يبلغه اي مخلوق=حظي كتبه الله وراضي بشقائي
لو يكتب التاريخ عن كل معشوق=ما نال قيس ابن الملوح وفائي
مادام انا التحنان والعطف والذوق=والحب مفرش لي وعشقي كسائي
لو كان ما يبقى لي الدم باعروق=باعيش في حبك وبعلن ولائي