عهدي بهـا قـدّام تلبـس عبايـه ................. وأنا بعد قبل البس شمـاغ وعقـال

طفلين نتهجّـى حـروف البدايـه ................. الله ياماأجمـل سواليـف الاطفـال

كانت لنا في كـل شـارع حكايـه ................ وكنّا نقول علـوم ماهيـب تنقـال!

وكنـت اتقاسـم مامعاهـا معايـه ............... من(عسكريم) التوت للعلك ابوريال

وكانت بعكسي شاطره في القرايـه .................... تقرأ جـزء عـمّ وطـه والانفـال

وأنا لك الله مـن مـواري غبايـه ............. مدري ابو نقطه هو الـذال او دال

وكانت لابويه تشتكي مـن شقايـه ............. وتعلّمه كيف اربط البـاب بحبـال

ياما على ظهري كسر من عصايـه ............... يقول لي:خلّك وأنا ابـوك رجّـال

وامي تقـول:ادع لولـدك الهدايـه ............ خوفي تصيبه كثرة الضرب بهبـال

لاشفتها مـع اول الـدرب جايـه ............ مدري أنا اللي ملت ولاّ الوطا مال!

احسّ قلبي يرتجـف فـي حشايـه ................ ماكنّه الاّ الضيـف لاهـزّ فنجـال

ياما عن"السّعلـي" تخبّـت ورايـه ............. لاخوفوها فيه ثـم شافـت ظـلال

تقول:خـلّـك يامحـمـد معـايـه ........ واسّتأنس العب عندها دور الابطال

وآغار حتّى من عيـون اصدقايـه ............ لاطالعوهـا قلت:تكفـون ياعيـال!