ماني أول مذنب الدنيا تغطيها الذنوب = ولاني آخر سارق بدنيا الظما والمسغبة
ايه انا سارق شعر ولا نويت إني أتوب = ودي أروى دامني ظامي من الشعر أعذبه
ودي اشري من فقيرٍ فرّ من نفسه هروب = شاعر حظه ردي مايوم حصل مطلبه
ماقدرت اشريه مثل الناس لجل اني مغلوب = حالي افقر من فقير ولا معي ما أكسبه
حيلة المضطر لامنه تحدته الكروب = ولا وجد غير ارتكاب الصعب لازم يركبه
من يقول انه ورث شعره من اسلافه كذوب = الشعر ساعة تجلي والمواجع تكتبه
وادري ان البعض ضاقت به فسيحات الدروب = مايبي قول الصراحه والصراحه تتعبه
إيه اقر واعترف من يقترف ذنب وعيوب = يكتبه ذنبه ويظهر لو يحاول يشطبه
استرقته من عيون الغيد والنظرة تنوب = عن تفاصيل المشاعر سرها ماتحجبه
من صهيل الخيل والتاريخ يوصف لي الحروب = والبطل ماغادر البتار صهوة منكبه
من تعابير الوجيه اللي يلونها الشحوب = واجمه من خوف يتم وجوع ذل ومتربة
من شعور الحزن يوم الشمس مالت للغروب= يوم ودعت بغياب الشمس يومٍ ما ا صعبه
من خضار التين والزيتون في أرض الجنوب = من عبير الورد والريحان والزهر أكتبه
لاسجع طيرٌ وغنى وانتشى الدوح الطروب = وقامت غصونه تمايل شوق مما يطربه
ماتلاقيني هناك ولا هنا قلبي يذوب = يغرق بدنيا الهوى واسقيه عشقي واشربه
خل هالعالم يقولوا عني اسرف بالذنوب = دامني شاعر وقلبي يحكمه من يسلبه