السلام ورحمة الله دار قومٍ مومنين = سابقين ولاحقين استوينا في المنام
جيت ابلغكم تحية مسلمينٍ نايمين = مثلكم موتى ولكن باستطاعتنا الكلام
عندنا جهل وضلاله عندكم علم اليقين = عندكم نورالحقيقه عندنا ليل وظلام
وان مشينا مامشينا إلا وحنا مبرمجين = ماهو على كيفنا... نمشي على كيف النظام
يتحكم في خطانا رايحين وراجعين = بتقنيه عصر الحداثه ماعلى المكره ملام
هذي علوم القبايل بعدكم يالطيبين = والمطر نرجي من الله خير من عدة اعوام
والشتا يمطر علينا غبار ادق من الطحين = وبالربيع نشاهد معاصيرها تذري الركام
ودي أسألكم أنا ..وشهو مصير الظالمين = لاصبحوا تحت اللحود الضيقه كيف المقام
ودي أسألكم عن أحوال القضاة المرتشين = كيف طابت واستساغوها وهي لقمة حرام
ودي أسالكم عن أحوال الشباب الضايعين = يوم سلمنا عليهم ..مايردون السلام
ودي أسألكم عن الحساد وأطيبهم لعين = من تشاهدهم تشوف الخبث وعيون اللئام
كيف تبغون المطر ينزل وفينا خايبين = لو نزل ماينزل الا لاستغاثات الهوام
وكيف يلعن بعضنا بعض ونذم الصالحين = وما لنا حجة ولا برهان ماغير اتهام
أغلبيتنا كذا ولاهوب كل المسلمين = مايزال الخير فينا وبيننا اخيار وكرام
ورغم هذا ياجماعه ماصحينا ..نايمين = ومابنا من عيب.. إلا انّا كثيرين الكلام