تويت
أنا ما نمت لين الصبح طفى شعلة المصبـاح= وكيف أنام و الفكـر اختلف وزنـه وتركيبـه
فتني صوته اللي مثل صوت البلبل الصـداح= تغلغل في شغاف القلب ما احلى عذب تطريبه
ذبحني ماتخيلت البشر تذبـح بدون سـلاح = ولا خذت احتياطي ماحسب الاقدار تجري بـه
غضيض العـود يتلـدن قوامه مايسٍ مياح= رشيق القد من قده صغيـر ماولج ريبـــه
حلو لا اقبل حلو لااقفى حلوفي الجد والامزاح = حلـو وده حلـو صـده الا يازيـن تعذيبـه
أبو عبدالله قال الله ما ازكى عطره الفواح = ربيعي النسايم مع طلوع الفجـر يسري بـه
تمكـن في خفوقي ثابت حبـه ولا ينـزاح= الا يالايمي جعلك تجرب بعض تجريبـــه
بغيت أخفي هواه ومقدرت أثر الهوى فضاح = ونا نايـم وانا صاحي وأنا مشغول أهذري به
أنا لو شافني مجنون ليلى رق لي ياصاح = وعاف العشق وادروب الوله ثم اعلن التوبه
سقى الله قبل أعرفـه كان قلبي خاليٍ مرتاح = قريـرالعيـن لاهم يودي بـه ولا يجيبــه
تعليق