تويت
بسم الله الرحمن الرحيم
يمـــــــــــــــــــــــــــــه
يمه فديتك من هموم اليالي = يمه عسى ما شر شفتك تونين
يمه خذي مالي ودوك الحلالي = يفداك يا يمه وأنتي تعرفين
يمه ترى منسى خيالك قبالي = يمه خيالك مسكنه داخل العين
إليا سمعت الصوت ينسر بالي = وانسى هموم الوقت وانسى الدواوين
يمه ترى الجنه معك والمعالي = يمه قدم رجلك أحطه على العين
أذكر زمان اول وانا فالدَلالي = أذكر تعبتي معي وانتي تربين
من كثر ما ركض من يمين وشمالي = واتعبك ما همي سوى اللعب تدرين
وتقولي اجلس يا وليدي ومالي = وانا مع الشارع ولعب الوراعين
احيان اقول إني صغيرٍ وسالي = العب مع الجهال لعب الشياطين
يوم اتذكر وش جرى في خيالي = مدري عن الأيام وشلون تمشين
يوم إني اكسر خاطرك ما ابالي = ما همني يمه صغير ومسكين
واذكر زماني يوم اشق الريالي = يوم الهلل والقرش يسوى الملايين
يا حسرتي يا وقتي اللي مضالي = يومـ(ن) اشوفك طول الأيام تبكين
مدري مرض ولا هموم تصالي = مدري تعب مدري كثر ما تحسين
يمه عسى روحي وحالي ومالي = فدوه لدمعك يوم للدمع تخفين
يمه لو الأيام تشرح سؤالي = سألت أنا الأيام وينك وانا وين
وسألت دمعك يوم بل الشيالي = يا دمعة تسوى كنوز السلاطين
وسألت حر الشمس وين الظلالي = وسألت قمرى الليل ما نورت زين
يمه أبي منك السموحه ولا لي = مطلب سوى تعفين عني وترضين
واخذي من الدنيا ودوك العيالي = أنتي لنا الراعي وحنا رعيين
وستأذنك وقتى ترى ما صفالي = ادعي لمن ضاقت عليه الفلاتين
ادعي لمنهو بيدته الليالي = عسى زمان راح يرجع وترضين
وصلاة ربي عد رمي النبالي = على نبيٍ وضح الحق والدين
خليل المطيري
تعليق