بسم الله الرحمن الرحيم

مشرفي وأعضاء منتديات الديره

السلام عليكم ورحمة الله وبركاته

هذه أول مصافحة لي معكم

إن شاء الله تحوز على رضاكم واستحسانكم



وجدان هاتي لي قلم معه كراس = ودي اسجل بالقلم جملة ادروس
وجدان أنا فكري له ايام محتاس = في خاطري شيء من العام محبوس
وجدان يا بنتي عرفت اكثر الناس = عرفتهم والناس ريس ومريوس
وجدان بعض الناس يشبه لقرطاس = يحفظ وله بالوقت مرجع وقاموس
وجدان بعض الناس مظهر وهنداس = لكن ما له عقل فاضي وملحوس
وجدان ما كل العرب نفس مقياس = لو ظاهره صالح ترى داخله سوس
وجدان يا كثر العذاريب فالناس = خليك في حالك ترى العيب مدسوس
وجدان علم الطيب خليه نبراس = وحبل الرجاء فالرب خليه ممسوس
وجدان اشوف الوقت دايس ودواس = والوقت له موجات بالبث محسوس
وجدان لا يعجبك لمعات الألماس = إن كان ما هو معك ما فاد ملبوس
وجدان لا تغتر في زين الألباس = زين العمل يا بنت تاجٍ على الروس
وجدان ألا يا قرب وقفات الأنفاس = مدري متى والعمر له وقت مقيوس
وجدان أنا حطيت للنفس محباس = والنفس لازم تدخل اليوم فاحبوس
وجدان ابا اكتب كلمة وسط الأقواس = (الدين راس المال ما تنفع افلوس )
وجدان كم واحد غني صابه الياس = اصبح فقير ومن ردى الحظ منحوس
وجدان كم رجلٍ حمل يوم له فاس = به يحتطب خلى الكسل عنه مكبوس
وجدان واصبح راعي الفاس سواس = من عقب ما هو والفقر حوس في حوس
وجدان صلي كل فرضٍ على ساس = واخذي الحذر لا يعجبك حال منكوس
وجدان طاعة والدينك هي الساس = لهم احقوق وحقهم فرض مدروس
وجدان هاذي كلمتي جت من الراس = وراجو عسى الله يصلح الراس والروس
وجدان واخر درس قفلت كراس = واكتب على اغلافه مقالات وادروس

خليل المطيري