هذا أنا مازينتني عمامه = ولا عقالي لبسته زينتني
انسان عادي مابوجهي وسامه = لو البس اغلى ثياب ماميزتني
ماهوب عيب الشكل لو به دمامه = كل المظاهر زايله ما عنتني
المشكله والعيب وأكبر ملامه = لوشانت اخلاقي ولا جملتني
إنسان بافعالي وعندي كرامه = ونفسي عزيزه ما بيوم احرجتني
وربعي هل الطولات واهل الشهامه = علومهم وسلومهم كسبتني
جود ورجوله سعد منهم حزامه = جموعهم لامن تعزويت جتني
احب من يفرض علي احترامه = لاقال كلمه راجحه ريحتني
وجهه بشوش ونضّرته ابتسامه = ياطيب طيب اخلاقه اللي سبتني
شيمه وقيمه هيبته في مقامه = رفيع قدر وصحبته ربحتني
مانيب مثل اللي يزيد اهتمامه = في مظهره وامشي واناظر لمتني
راسه تقل مستخرجه من قمامه = متروس جل وبكلته نرفزتني
ومشيته تشبه لمشي الحمامه = ليته مره مرت ولا عبرتني
يغيضني من يعتني في قوامه = ثوبه مخصّر حالته صدعتني
وربي انه مايساوي قلامه = هذا الهلامه سيرته حيرتني
ونبغي نحرر قدسنا من ظلامه = بشلةٍ منحلةٍ شيبتني
هذي مشاهد مدمنين الرخامه = ماهي إشاعة مغرضين ولفتني
الصدق له عندي دليل وعلامه = ما اكذب اعيوني واقول خدعتني
والخافي اعظم منه يالله السلامه = رقابتي لاجيت اقوله نهتني
حنا لعرب قوم الذكا والفهامه = نفهم على الطاير كذا فهمتني
حنا جحا واشعب مع ابو دلامه = وابو نواس وخمرته سطلتني
والشاعر الشعبي وشدة غرامه = والترفه اللي بالهوى عذبتني
ياكم طرق بيبانها من هيامه = ولاكل متني ولا بعد كلمتني
تاج لعرب قالوه لبس العمامه = صحيح لكن العرب جننتني
من المحيط إلى الخليج الكرامه = راحت وطي وتدهورت واحزنتني